Chlaushöck 2023

Dani Wüest

Chlaushöck 2023

Am 7ni schöön hemer gwartet gha,
vor de Halle, z’Samstagara.
Mit vorerst unbekanntem Ziel,
simer denn gange uf Richterswil.

Wohlig warm ischs gsi, sogar sehr,
i de Bäsebeiz, grad bim See.
Gmüetlich hemers gha, doch nöd lang simer alleini gsii,
bis a de Türe sind gstande de Chlaus und sin Schmutzlii.

D’Timea, d’Leonie und de Andi
hend de Start gmacht gha vo däre Bandi.
Die eine hend z’viel trunke, die andere zwenig ahgleit,
ach, de Chlaus hed fast chli Mitleid.

Gwüssi hend Glück gha das Jahr und nöd müesse befürchte e Fitze,
währenddem anderi gad mehrmals hend müesse schwitze.
D’Linda zum Biispiel, heig trunke wie es Kamel,
und denn verzellt aaaalles vo de Seel.

Aber au vo Liebesgschichte hed de Chlaus gwüsst z’brichte,
zum öppis verrate hends aber welle verzichte, die zwei Protagoniste.
Wieder anderi gönd da forscher vor und büütet ah,
uf de Sesseli, ganzi Seminar.

Sportlich gahts im TV ja na öppe zue und her, da stellt sich au d’Sonja nöd quer.
Drum hed sie sich nöd la lumpe, und isch mit de Daniela im Hüttni ga gumpe.
Nöd lang heds duuret, da hed d’Sonja gmuulet:
Ach oh Schregg, mini Brülle isch weg…

De Jannis, de Vasco und de Andrin – ja das isch es Dreamteam!
Grüehmt sinds worde vom Chlaus, wo grad hed chönne ablade
alli Kompliment zum rote Fade.
Zäme mit de Moana und de Rahel hend sie dur de Abig gfüehrt so souverän,
keis Wunder hend sie ganz viel Fään!

Au de Heimlifeiss Thomas hed zum Chlaus derfe spaziere,
und einige Gschichte und e Fitze müesse kassiere.
De Fabian hed am Chränzli kocht ganz guet und schön,
für das ischer globt worde i de höchste Tön.

Wo de Chlaus denn selber na z’ghöre becho hed es Gschichtli,
da hemer gwüsst: glii ischer fertig mit de Brichtli.
Na lang simer bliebe, schöön und gmüetlich isch es gsii,
nächst Jahr gern wieder, denn so simer z’friede. 😊